Қазақтың маңдайына біткен ақыны Қадыр Мырза Әлі «Нағыз қазақ қазақ емес, нағыз қазақ домбыра» десе, дегендей – ақ. Домбыраның үнінде қазақтың жаны, тарихы, ғұмырнамалық сыры жатыр. Сан ғасыр өтсе де сонау толғауда толғау толғатып, күмбірлете күй төгіп, таңдайда сайрап бұлбұлы, талайы топты жарған дүлдүлдің бағын ашқан да осы қос ішекті домбыра. Бабаларымыздан мирас, ұрпаққа жеткен мұра да домбыра. Қос ішектің құдыретіне таң қалмаған жан болмас, сірә! Ал, оның сырына қанығып, он саусағын ойнақшыта айқастырып, шерін тартқан да қазақтың сүлейлері. Сол сүлейлердің сүбелі сарқытын сақтап, домбыраның қадір-қасиетін жастарға қаз қалпында дәріптеуде ұлы көштің ізін суытпай келе жатқан ұжымның бірегейі –Дина Нұрпейісова атындағы Академиялық қазақ халық аспаптар оркестрі. Атауына сай құрылған ұжымдық оркестр - Тәуелсіздіктің төл құрдасы. Жылдар жылнамасында ордадан ойып тұрып орын алған тарихы бар. Танымалдығы әлемге аян. Республикалық, халықаралық сахналарда жеңімпаз атанып, қазақтың өнерін қалың бұқараға паш еткен оркестрдің еңбегі ұшан-теңіз.
Дина шешеміздің күйшілік қасиетін сөзбен жеткізу мүмкін емес. Осындай күй құдіретін түсінген ұрпақтар да аз болмады елімізде. Тарихқа көз жүгіртсек, бұл орекестрдің өркендеуіне өлшеусіз үлес қосқан өнер иелері С.Құсайынов, Б.Рзаханов, Р.Ғабдиевтердің еңбегі зор. Есімдері алтын әріппен жазылған тұлғалар ел жадынан ұмытылмайды. 1957 жылы іргетасы қаланып, 1990 жылы кәсіби ұжым ретінде отау тіккен Дина Нұрпейісова атындағы Академиялық қазақ халық аспаптар оркестрінің құрамында жергілікті жердің жастары болатын.
Жылдар легінде шығармашылық ізденіс пен кәсіби шеберліктің арқасында оркестр тек қазақтың композиторларының ғана емес, шетел классиктерінің де музыкалық шығармаларын шебер орындады. Оркестр өнер сапарымен Түркия, Германия, Австралия, Франция төрінде дәстүрлі өнерді дәріптеді. Тектіліктің тамыры көне аспап домбыраға деген құрметтен-ақ көрініп тұр. Тәуелсіздік жылдарында кәсіби ұжым аталғалы өркестрде Қ.Ізекенов, Т.Сәкенов, А.Наурызғалиев, М.Ғұмыров, М.Ғабдиев, Қ.Дүйсенбай сынды ағалар басшылық қызметте болды.
Құрылғанына биыл 35 жыл толатын оркестрдің репертуарында 800 – деген аса шығармалар жинағы бар, солардың ішінде негізгі орынды қазақтың ән-күйлері алады.
