Жер-Анаға тіршілік нәрін сыйлаған, жыл басы — Әз Наурыз құтты болсын! Ұлттық дәстүріміздің әлемге танылып, ұлттық киім киген бүкіл қазақстандықтардың шеру тартар, мерейі асқан күні!

Дина Нұрпейісова атындағы Академиялық қазақ халық аспаптар оркестрі мен «Сармад» этно-фольклорлық ансамблі «Исатай — Махамбет» алаңында өнер көрсетті. Концерт шымылдығы «Көңілашар» күйімен ашылды.

Дархан халықтың бабадан балаға мирас болған баға жетпес рухани құндылықтарын бес құрлыққа паш етіп жүрген үлкен өнер ордасының әртістері тамаша кешті тыңдармандарға тарту етті.

Алғашқы кезеңінде оркестрдің бас дирижері, әрі көркемдік жетекшісі «Дарын» мемлекеттік жастар сыйлығының лауреаты Болат Долдашовтың дирижерлеуімен Ықылас “Жезкиік”, Құрманғазы «Адай», Н.Тілендиев «Махамбет», Құрманғазы «Сарыарқа» сынды күйлер орындалды.

Сонымен қатар жеке орындаушылар алаңға жиналған жұртты өз өнерлерімен тәнті етті. Атап айтсақ, ҚР «Ерен еңбегі үшін медалі» иегері Аманжан Басығариев және республикалық конкурстардың лауреаттары Аружан Ерімова, Жанар Қорғанова, Берік Амантаев, Байбақты Ідірбай, Мырзабек Каримуллаев, Мейіржан Қабдолов, Айбек Сапанов, Бақытбек Сарсенов, Қадірбек Әмірғали, Абдулла Мұқанғалиевтар өнер көрсетті.

Концертте «Сармад» этно-фольклорлық ансамблі Бауыржан Ақтайдың «Шашу», «Алаш аманаты», «Көшпенділер рухы», «Қайран елім», «Көктем сазы» , халық әндері «Әгугай», «Япурай», «Әләлім» және ансамбілінің әртісі жетіген аспабында Әйгерім Караменова да өнер көрсетіп халыққа көтеріңкі көңіл күй сыйлады.

Жүректі шаттыққа бөлеп, ел алғысына ие болған оркестр ұжымының Ескендір Хасанғалиевтың «Атамекен» әнімен кешті қорытындылады.

Наурызнаманың он күндігі аясында өткізілген шарада оркестр ұжымы тыңдармандарды ән мен күйге бөледі.